LAOAG CITY – Nagyaman ni 2nd Lt. Charles Javier Juan Calapini Jr. iti Philippine Air Force ken residente iti ili ti Burgos iti Sang Panlalawigan kalpasan a kinomendaran da daytoy gapu iti panagturpos na iti United states Air force Academy idiay Colorado, United States kas scholar.
Segun kenkuana, maipannakkel na iti panagbalin nga Ilokano gapu ta daytoy ti simbolo ti kinagaget.
Kunana a saanna a maildawan no kasanu ti kinarigat dagiti nagdalanan na a training, ngem no mapanunot na nga Ilukano daytoy ket isu iti agserbi a pigsana tapno maileppas na ti panagsanay na.
Naamoan a sakbay a napan nagadal ni Calapini idiay Amerika ket dean’s lister isuna iti Philippine Military Academy Class 2024.
Isuna ket maysa kadagiti kwalipikado iti Foreign Pre-Commission Training Institution program iti nasao nga akademya idiay Estados Unidos idi 2019.
Kabayatanna, inawat ni Calapini ti Certificate of Commendation iti Sang Panlalawigan kadwa na ti pamilya na.
