LAOAG CITY – Inbatad ti Department of Justice a saan laeng a dagiti agasawa a Pacifico ken Sarah Discaya ti umas-asideg iti ahensya tapno agkiddaw iti proteksyon.
Segun kenni Justice Secretary Jesus Crispin ‘Boying’ Remulla, umabot iti tallo agingga iti uppat a tattao ti agkalikagom a mapan iti opisina na tapno kiddawen a maipan da iti babaen ti witness protection program.
Inlawlawag na a saan laeng a dagiti Discaya ti namnamaen na a makasarita ti Department of Justice a posible a mangipaay kadagiti ammo da seknan iti anomalya a flood control projects.
Kuna ni Justice Secretary Remulla nga iti sumaruno a lawas ket mabalin da a makasango ken makasarita dagiti maseknan ken inpasigurado da a tingitingen a nalaing ti ahensya dagitoy.
Ditoy nga inlawlawag ni sekretaryo ti panangiproseso kadagiti kayat na nga agtestigo wenno maipaayan ti proteksyon ti estado no sadinno dumalan da iti ebalwasyon kenberipikasyon.
Mainaig iti daytoy ket nagkedked ni Remulla a mangidetalye no sisinno dagiti tallo wenno uppat nga indibidual nga agkalikagom met para iti witness protection program.
Inbaga na laeng nga adda ti maysa nga opisyal manipud iti Department of Public Works and Highways ti kayat da nga alaen a posible a makatulong iti imbestigasyon.
Innayon na a makikoordenar wenno ipakaammo da iti Senado wenno Senate Blue Ribbon Committee sakbay a mangaramid da ti baro nga addang.
Aminado pay ni Justice Secretary Remulla a saan nga ang-angaw ken saan nga alisto ti proseso para iti witness protection ti ahensya.
