LAOAG CITY – Nakumpiskar dagiti nagduduma a klase ti agas nga agbalor ti 3.4 a milyon a pisos a dagitoy ket kangrunaan a gatgatangen ti publiko.
Natiliw dagiti sumagmamano nga indibidual babaen ti naiyuswat a search operation dagiti kameng ti National Bureau of Investigation iti Brgy. 1 ditoy siudad ti Laoag.
Segun kenni NBI chief Hilario Manding, iti NBI ditoy siudad, nakumpiskar da dagiti maipagarup a peke nga agas kas iti Biogesic, Alaxan, Kremil-S, Medicol, Solmux, Myra E, Decolgen, Bioflu, Neozep, ken Dolfenal.
Binigbig ni Manding ti akinkukua ti bodega a naisayangkatan ti search operation a ni Mary Ann Incilio, a tubo iti ili ti Sinait, Ilocos Sur idinto dagiti agkaskasera ket dagiti distributor.
Inbunannag na a maipapaayan ti suplay dagiti tianggi ken sumagmamano a parmasya babaen kadagiti maipagarup a peke nga agas.
Possible a sumango dagiti maseknan iti panaglabsing iti
RA 8293 wenno Intelectual Property Code ken Law on Counterfeit Medicines.
Nupay kasta, kuna ni Manding a maipadalan dagiti nakumpiskar nga agas iti laboratory examination para iti naan-anay a pannakaberikar a peke dagiti nadakamat nga agas.
Immuna iti daytoy, inadmitir ni Manding a nangiyuswat da nga umuna ti test buy ken dagiti nagatang da nga agas manipud iti bodega ket naisumitir iti United Laboraties ket dita a nakaawat da ti sertipikasyon a peke dagiti agas.
Inpakaammo ti NBI chief ditoy siudad ti Laoag a nasken a kumpirmaren dagiti agas a magatgatang babaen iti panagsukisok iti internet tapno maamuan dagiti pagilasinan ti lehitimo nga agas kas iti panagduma dagiti letra a nakasurat, ken iti kolor dagiti agas.
