LAOAG CITY – Inpakaammo ni Dr. Melvin Manuel, mangidadaulo ti City Disaster Risk Reduction and Management Office a dimmakkel ti dalluyong kadagiti kabaybayan ditoy siudad ti Laoag gapu iti epekto ti Bagyo Enteng.
Gapu iti daytoy, kunana a naiget ti pannakikoordinarda kadagiti amin a barangay opisial tapno katinnulongda iti panangballaag kadagiti residente nangruna kadagiti mangngalap.
Inlawlawagna nga idi pay laeng rabii ket addadan iti opisinada tapno mamonitor a naimbag ti kasasaad dagiti umili ken maipasigurado ti kinatalged dagitoy.
Kunana a dagiti kangrunaan a monmonitorenda a barangay ditoy siudad ti Laoag ket iti Brgy. 2, Brgy. 29, Brgy. 7B ken dagiti coastal areas.
