LAOAG CITY – Nalayus ti tallo a klasrum ti Central Elementary School iti ili ti San Nicolas gapu iti napigsa a tudo idi rabii.
Ti nasao a klasrum ket isu ti agdama a temporario nga agserserbi a billeting quarters dagiti National Technical Officials ti Lawn Tennis para iti Palarong Pambansa 2025.
Mainaig iti daytoy, agarup alas onse idi rabii a kabayatan matmaturog dagiti nasao nga opisial ket kellaat dagitoy a nakariing gapu ta nadlawda a simrek ti danum iti klasrum gapu iti napigsa a tudo.
Gapu iti daytoy, nabasa dagiti sumagmamano a kagamitan dagitoy ken inparabawda pay laeng kadagiti tugtugaw tapno saan a madanon ti layus.
Naammoan a temporario nga immakar iti conference room dagiti maseknan nga opisial ken nasapa dagitoy a rimmuar gapu kadagiti naikeddeng nga ay-ayamda.
Iti agdama, manarimaan nga agdaldalus ken agiplasplastar dagiti manursuro iti nasao a pagadalan kadagiti tallo a klasrum a nalayus.
