LAOAG CITY – Dead on the spot dagiti tallo a lallaki kalpasan a napandagan dagitoy ti dump truck iti naglugananda a kurong-kurong iti Bgry. 23, Sta. Cecilia iti ili ti San Nicolas.
Segun ken ni Police Major Eduardo Santos, ti Hepe iti Philippine National Police iti ili ti San Nicolas, nabigbig dagiti biktima a residente iti ili ti Dingras, San Nicolas ken iti siudad ti Laoag idinto nga adda iti umiso a tawen ti driver ti dump truck.
Inbatadna a basar iti insayangkatda nga imbestigasion ket nagsagaba ti nakana a sugat ti nakalugan iti kurong-kurong a nangitunda ti dagus a pannakatay dagitoy idinto a nagsagaba ti sugat iti nagduduma a paset iti bagi ti driver ti dump truck.
Inlawlawagna nga agpada nga aggapu iti ili ti Sarrat dagiti dua a lugan no sadino nag-flasher lights ti kurong-kurong nga agpakannawan tapno mangan iti carinderia nga asideg iti nakapasamakan ti lugar.
Kunana a napukawan iti kontrol ti manibela ti driver ti dump truck a nagkarga ti darat agingga a napan iti sabali a linya ti kalsada a nangitunda ti pannakatulidna ken pannakapandag kadagiti biktima.
Gapu iti nasao a desgrasia, inpalgakna a nangitunda daytoy ti nairot a trapiko kadagiti dumaldalyasat a motorista.
Kabayatanna, manamnama a mapilaan ti kaso a Reckless Imprudence Resulting to Multiple Homicide and Damage to Property ti driver ti dump truck.
