LAOAG CITY – Balligi a natiliw dagiti tallo nga indibidual gapu iti iligal a panagsusugal iti sirok ti Gilbert Bridge iti Brgy. 10 ditoy siudad ti Laoag.
Basar iti Philippine National Police ditoy siudad, nabigbig dagiti suspek nga agtawen ti 62, agtawen ti 25 ken agtawen ti 37 ken agpapada dagitoy a residente iti Brgy. Suyo iti ili ti Dingras.
Segun kadagiti otoridad, adda ti maaw-awatda a report maipapan iti maipagarup iti kinaadda dagiti agsusugal iti sirok ti rangtay rason a dagusda a nangiwayat ti Anti-Illegal Gambling Operation.
Gapu iti daytoy, naaktuan dagiti otoridad dagiti maseknan a suspek nga agay-ayamda ti tong-its.
Nakumpiskar dagiti gambling paraphernalia kas ti baraha ken 1,900 a mapapati a nausar a pusta dagiti suspek.
Innayonna a saanen a nakataray wenno nakalibas dagiti maseknan nga indibidual gapu ta napalikawkawan dagitoy dagiti napan nagresponde a pulis.
