LAOAG CITY – Naibakwit ti tallo a pamilia manipud Brgy. 3 ken Brgy. 4 iti ili ti San Nicolas iti evacuation center kas paset ti pre-emptive evacuation ken panagsagana iti agbalin nga epekto ti Bagyo Kristine.
Segun iti Mayor iti nadakamat nga ili a dagus a nakisaritada dagiti residente, nangruna dagiti agnanaed kadagiti nababa a lugar nga agbakwit.
Innayonna a nasaysayaat no nasapa a pumanaw dagiti pamilia tapno saanda nga agdardaras nga agturong kadagiti evacuation centers.
Kinuna nga agtultuloy ti panangmonitorda iti tunggal barangay tapno masigurado a makabakwit nga insigida dagiti residente a kangrunaan a maapektaran.
Kabayatanna, nagballaag ti lokal a gobierno a no madlaw dagiti residente ti panagngato ti lebel ti danom ket insigida nga agbakwit wenno umakar iti nangatngato a lugar.
