LAOAG CITY – Nangipasa ti Sang Panlungsod ti tallo a resolusyon ditoy ciudad ti Laoag tapno bigbigen dagiti atleta a nakaiyawid ti medalya iti kalepleppas a Palarong Pambansa 2025.
Mismo a ni Sang Kabataang Federated President Michael Christophe Agustin ti nangidasar kadagiti nasao a resolusyon iti konseho ditoy ciudad.
Kunana a babaen kadagitoy a resolusyon ket maipaayan ti pammigbig ken panangkablaaw dagiti atleta.
Mainaig iti daytoy, inpakaammo ni Agustin a dagiti maipaayan ti pammadayaw nga atleta ket isuda Dominic Joseph Nacnac manipod iti Mariano Marcos State University Laboratory High School a nakagun-od ti bronze medal iti 200m individual medley elem category; Loryne Rhian Marcos manipod iti Ilocos Norte College of Arts and Trade a nakagun-od ti gold medal iti rhythmic gymnastic ribbon ken 2 a bronze medal iti rhythmic gymnastic scope and club; ken ni Juancho Bermudez Mariano Marcos State University Laboratory High School a nakagun-od ti bronze medal iti meter breastroke.
Inpalgak ni Agustin a rumbeng a mapadayawan dagitoy tapno agserbi kas inspirasyon iti sabali nga ubbing nga addaan ti arapaap nga agbalin met nga atleta.
