LAOAG CITY – Nagballigi dagiti otoridad a nangarestar kadagiti tallo a wanted person iti nagsasaruno nga operasyon ditoy probinsya.
Immuna a natiliw ni Warlito Nicolas Arzaga, agtawen ti 42, naasawaan, ken residente iti Barangay 21, San Agustin iti ili ti San Nicolas.
Ni Arzaga ket sumangsango ti kaso a qualified rape of minor ken kaso nga acts of lasciviousness no sadinno nga awan ti nairekomendar a pagpiyansa ti akusado.
Maikadwa a naarestar ket ni Abraham Santos Salvador, 50, naasawaan, ken residente iti Brgy 1, San Lorenzo ditoy ciudad ti Laoag.
Naarestar ni Salvador iti Brgy 1, San Francisco iti ili ti San Nicolas babaen ti nagtipon a pwersa ti San Nicolas Municipal Police Station ken Ilocos Norte Provincial Special Enforcement Team (INPSET) gapu iti tallo a kaso a panaglabsing iti Sec 5 Article III ti Republic Act 7610 (Lascivious Conduct)
Nairekomendar ti 180 ribo a pisos a piyansa ti akusado iti kada kaso a sangsangwen na.
Kabayatanna, ti maikatlo a naarestar ket ti Melchor Ale Califlores, agtawen ti 33, awanan ti asawa, negosiante, ken residente iti Brgy Pancian iti ili ti Pagudpud.
Ti pannakaarestar ti akusado ket gapu iti kaso na a panaglabsing iti Sec 5 (a) ken Sec (I) ti Republic Act 9262 wenno Anti-Violence Against Women and their Children Act of 2004.
Narekomendaran iti piyansa ti akusado a 2 ribo a pisos ken 72 a ribo a pisos para kadagiti sangsangwen na a kaso.
Iti agdama, nagtalinaed ti akusado iti Philippine National Police ditoy ciudad ti Laoag.
