LAOAG CITY – Inpila ti Department of Justice (DOJ) ti 3 counts ti kaso a Grave Threats kontra ken ni Vice President Sara Duterte iti Regional Trial Court ti Quezon City.
Nupay kasta, inbasura ti DOJ ti reklamo nga Inciting to Sedition nga immunan nga inpila ti National Bureau of Investigation (NBI) kontra kenkuana.
Sinungbatan met ti kampo ti Bise Presidente ti nagbalin nga adding iti babaen ti legal counsel-na manipud iti Chua Lim & Associates a ni Atty. Paul Lawrence Lim.
Kuna ni Lim a namnamaen ken isagsaganaan ti legal team ti kastoy a desision.
Inpetteng pay ti abogado nga iti babaen ti linteg, agtalinaed nga inosente ti Bise Presidente ken adda talekda a maibasura iti nasao a reklamo.
Gapu kadagiti seryoso nga isyu, impasigurado ti kampo ti Bise Presidente nga usarenda amin a gundaway ken available a legal remedies iti umno a panawen.
