LAOAG CITY – Napaluspusanen dagiti tallo nga indibidual a naarestar gapu iti iligal a panagsugsugal iti Brgy. 19, Sta. Marcela ditoy siudad ti Laoag kalpasan a nakabayad dagitoy ti pagpiyansada para iti temporario a pannakawayada.
Nupay kasta, nagtalinaed dagiti dua pay nga indibidual a kaduada a natiliw gapu ta saanda a nakabayad ti pagpiyansada rason a manamnama a maipisok dagitoy iti Bureau of Jail Management and Penology ditoy siudad ti Laoag.
Basar iti Philippine National Police ditoy siudad, nagbayad dagiti tallo nga indibidual ti sag-30 ribu a pisos idinto nga awan pay ti pagbayad dagiti dua a kakaduada.
Maipalagip a natiliw dagiti suspek a nabigbig nga agtawen ti 45, awanan asawa, agtawen ti 60, addaan ti live-in partner, agtawen ti 32, addaan ti live-in partner nga agpapada a residente ti Brgy. 19 ditoy siudad idinto a dagiti dua ket agtawen ti 49 ken agtawen ti 43 nga agpada a residente ti Brgy. 17 ditoy siudad ti Laoag.
Immuna iti daytoy, nakumpiskar ti 5,660 a mapapati a nagbalin a pusta dagiti maseknan a natiliw kabayatan ti panagay-ayamda ti Lucky 9.
