LAOAG CITY – Natay ti tallo nga indibidual idinto a nasugatan ti siam a dadduma pay iti napasamak a pammaltog iti maysa a nightclub idiay Brooklyn, New York.
Naammoan a dagiti biktima ket agtawen ti 19 agingga iti 61 ken dagiti nasugatan a biktima ket naitarayen iti ospital.
Inbatad ni New York Police Department Commissioner Jessica Tisch a mamatida nga adda ti uppat nga indibidual ti nagpaputok ti paltog.
Mainaig iti daytoy, dumanon iti 42 a kapsula ti saan pay a masinunuo a klase ti paltog ti nakita dagiti otoridad iti nakapasamakan ti krimen ken maysa a paltog ti narekobre iti asideg ti lugar.
Rumrummuar a riri ti dua a gang ti namunganayan ti nasao a pammaltog.
Nagpanawagan ni New York City Mayor Eric Adams kadagiti nakakita a makitinnulong tapno insigida a maarestar dagiti adda iti likudan ti pammaltog.
