LAOAG CITY – Maipatungpal ti gun ban iti uneg ti tallo nga aldaw idiay Metro Manila iti maiyuswat nga State of the Nation Address (SONA) ni Presidente Ferdinand Marcos Jr. inton Lunes, Hulio 22.
Segun ken ni Philippine National Police – Civil Security Group Spokesperson Police Lt. Col. Eudisan Gultiano, masuspinde ti Permit to Carry Firearms Outside of Residence (PTCFOR) mangrugi iti alas-12:01 ti parbangon ti Sabado, Hulio 20 ken agpaut agingga inton alas-12 ti tengnga ti rabii ti Hulio 22.
Ti gun ban ket kas paset ti precautionary measure tapno masigurado ti seguridad iti State of the Nation Address.
Immunan nga inbatad ti Philippine National Police a mangiwarasda ti 22 a ribu a pulis iti State of the Nation Address.
Inpasigurado met ti Philippine National Police ti pannakaipatungpal ti maximum tolerance kadagiti maiwayat a tignay-protesta iti aldaw ti State of the Nation Address.
Inlawlawag ni Gultiano nga epektibo laeng ti nasao a gun ban iti National Capital Region (NCR) maisupadi iti immuna a nairakurak a nationwide ti pannakaipatungpal daytoy.
Innayon pay ti opisial, dagiti laeng naka-duty nga uniformed personnel ti mapalubusan a mangitugot ti paltog kadagiti nadakamat nga aldaw.
