LAOAG CITY – Kinumpirmaran ni Police Staff Sergeant Jhan Lay Apostol iti PNP-San Nicolas ken imbestigador iti pannakakuryente dagiti dua a lineman ti INEC a puon ti nakatayan da nga adda ti pinilaan da ti kaso seknan iti daytoy.
Binigbig ni Apostol dagiti tallo nga empleado nga isuda Engr. Bing Agdigos, ti General Manager ti INEC; Engr. Erol Danilo Franco, ti in-charge iti switch nga adda it sub-station; ken ni Jerry Escalona nga isu ti foreman bayat ti panagtarimaan dagiti dua a lineman.
Segun kenni Apostol, bayat ti panangimbestigar da ket nakita da a da Franco ken Escalona ti responsable iti insidente gapo ta isuda ti nangidaulo iti panagtarimaan.
Inbatad na nga inraman da a pinilaan ti kaso ni Agdigos gapo ta isuna ti mangidadaulo ti sub-station.
Nupay kasta, kuna ni Apostol nga agdependar iti piskalya no maipursige ti kaso ni Agdigos.
Inlawlawag na nga idi Oktubre 7 itay napan a tawen ket inpila da ti kaso ken idi Oktubre 23 ket nakaawat da ti subpoena isut gapo na a naikkan ti 10 nga aldaw ni Escalona tapno agisubmitir ti counter affidavit na ngem agpapan ita ket awan pay daytoy.
Kunana a ti laeng ur-urayen da ket ti resulta ti evaluation ti piskalya tapno makita da no adda ti probable cause ti kaso a naipila kontra kadagiti tallo nga indibidwal.
Ummunan nga inbatad ni INEC Board President Enrico “Cocoy” Ruiz nga ipaay da ti legal assistance kas tulong kadagiti maseknan a napilaan ti kaso.
