LAOAG CITY – Natay ti tallo nga indibidual ken naruay dagiti nasugatan kalpasan a narpuog ti maysa a pasdek no sadinno a maisaysayangkat ti prayer recital idiay Java, Indonesia.
Adda ti agarup maysa a gasut nga indibidual a kaaduan ket babbai ti nagtitipon para iti Koran recital iti community hall ti Bogor district, Java tapno lagipen ti panagkasangay ni prophet Mohammed idi kellaat a narpuog ti nasao a pasdek.
Inbatad ni Mochamad Adam Hamdani, maysa nga opisial manipud iti local disaster mitigation agency a basar iti inisyal a datos ket adda ti 84 nga indibidual ti manarimaan a matamtaming ken tallo ti pimmusay.
Inlawlawagna a dakkel ti posibilidadna a marpuog ti pasdek gapu iti panagdudupudop dagiti tattao.
Innayonna nga insigida a naitaray iti ospital dagiti biktima a kaaduan kadagitoy ket nagsagaba ti minor injury.
