LAOAG CITY – Saan a nagkurang ti panangpalagip ken pammagbaga dagiti Barangay Officials ti Barangay Nangalisan-A ditoy siudad ti Laoag.
Daytoy ti nagbalin a sungbat ni Brgy. Chairman Alexander Alcid iti nasao a Barangay kalpasan nga adda tallo nga indibidual ti natiliw gapu iti iligal a panagsusugal iti maysa a minatayan.
Segun kenkuana, dagiti kabarangayanna a naarestar ket maysa a tricycle a driver ken dua nga agtartrabaho iti pagaramidan kadagiti bloke no sadino maysa kadakuada ket anak ti kabsat ti natay.
Inbatadna a posible a ginundawayan dagiti maseknan ti panagay-ayamda gapu ta agingga alas onse ti rabii ti panagpatrolya dagiti naka-duty a Barangay Tanod iti barangayda.
Mainaig iti daytoy, basar iti imbestigasion dagiti otoridad ket nakumpiskar ti 11 a ribu a pisos a nausar a pinagpusta dagiti suspek, baraha, tugtugaw ken lamisaan a naaramat kabayatan ti panagay-ayam dagitoy ti Lucky 9.
Kabayatanna, iti agdama ket na-inquest dagiti suspek para iti naan-annay a pannakaimbestigar ti nasao a pasamak.
