LAOAG CITY – Maisagsaganan ti kaso mainaig ti panaglabsing ti comelec liquor ban kontra kadagiti tallo a tattao iti San Nicolas, Ilocos Norte.
Daytoy ket kalpasan a naaktwan dagiti otoridad ti panagin-inom ti arak da Albert dela Cruz, agtawen ti 33, baro, taga San Carlos City, Pangasinan ngem agdama nga agnanaed iti Barangay 6 iti ili ti San Nicolas ken ni Nelson Acosta, agtawen ti 42, construction worker taga Barangay 4 ti met laeng nasao nga ili.
Malaksid kadagiti dua ket karaman pay a tiniliw ken pilaan ti kaso dagiti kameng ti pulisya ket ti agtagikua ti tianggi a gimmatangan ken pagin-inoman da.
Nabigbig ti agtagikua ti tianggi a ni Mrs. Evelyn dela Cruz, agtawen ti 34, taga San Jacinto, Pangasinan ngem agdama nga agnanaed iti Barangay 6 iti ili ti San Nicolas.
