LAOAG CITY – Natiliw dagiti tallo a tattao gapo ti iligal a pangsusugal da idiay Barangay 6, San Juan Bautista iti ili ti San Nicolas.
Nabigbig dagitoy a da Mylene Laureta y Piminetel, agtawwen 29, addaan ti live-in partner; Nelson Asuncion y Felipe, agtawen ti 43, awanan ti asawa ken ni Fe Gutera y Garcia, agtawen 54, naasawaan, agpapada a residente iti nasao a lugar.
Segun ti imbestigasyon, nakaawat da ti report mainaig ti iligal a panagsusugal iti nasao a barangay nangruna iti Mila’s Store.
Gapo iti daytoy, dagus a nagreposde ti PNP-San Nicolas ket ditoy a naaktuan da ti manarimaan a panagay-ayam dagiti maseknan ti tong-it iti mismo a pagtaengan ni Laureta.
Nakumpiskar ti maysa a baraha, maysa a 50 peso bill, innem a 20 peso bill, maysa a 10 peso coin, tallo a 5 peso coins, lamisaan a folded, monoblock chair.
Manamnama met nga ita nga aldaw ket mapilaan dagiti nasao a suspek ti maiyannatop a kaso.
