LAOAG CITY – Umaboten iti 10 a crew members ti naisalakan idinto a tallo a sabsabali dagiti kumpirmado a natay kalpasan a rinaot ti Houthi rebels ti Yemen ti cargo ship a nangitunda ti pannaka-arinebneb na iti Red Sea.
Basar iti United Kingdom Maritime Trade Operations (UKMTO) agency, ti Liberian-flagged, Greek-operated Eternity C ket addaan ti 25 a crew.
Inbatad ti ahensya a nagpasar ti dakkel a perdisyon ken napukaw amin ti propulsion ti bangka kalpasan a natamaan ti rocket-propelled grenades a napaputok manipod kadagiti babassit a bangka.
Kabayatanna, inpetteng ti Iran-backed Houthis a rinaot da ti Eternity C gapu ta agturong daytoy iti Israel ken inkabil da ti saan a masinunuo a bilang ti tripulante iti nataltalged a lokasyon.
Mainaig iti daytoy, inpalgak ti embahada ti Estados Unidos iti Yemen a kinidnap dagiti Houthis dagiti nakalasat a crew ti Eternity C ken nagpanawagan para iti dagus a pannakawaya-waya da.
Immunan nga inrakurak dagiti otoridad ti Pilipinas a 21 manipod kadagiti crew ti Eternity C ket Pilipino.
