LAOAG CITY – Ilunglungalong ni Senator Win Gatchalian iti pannakabukel ti tallopulo a tawen a napaot a plano iti imprastraktura tapno maliklikan dagiti budget insertion ken masigurado iti nangat-ngato a benepisyo kadagiti proyekto a ponpondoan iti gobierno.
Iti babaen ti Senate Bill 1652 wenno Masterplan for Infrastructure and National Development Act (MIND), gagem a maaddaan iti napaot a masterplan nga agserbi a guide iti panagdur-as iti napapateg a proyekto uray agsukat iti administrasyon.
Gagem da a masigurado a ti pondo ket mailatang kadagiti proyekto a direkta a pakairanudan dagiti umili nga agbaybayad iti buwis.
Inpaganetget ni Gatchalian a kasapulan a maikkat ti impluwensia ti pulitikal iti panagpili ken pannakaipatungpal dagiti proyekto kangrunaan ket dakkel a paset ti national budget iti nailatang iti imprastraktura.
Maibasar iti listaan ti Department of Budget and Management, ngimmato ti average a 7.9% kada tawen ti pondo a nakalatang iti national infrastructure projects manipod 2022 agingga 2025.
Kabayatanna, manamnama nga iti naan-anay a panagbalin a linteg ti gakat ket masigurado ti agtultuloy a pannakaipatungpal ti proyekto ken ti naurnos a pannakaaramat ti pondo iti gobierno.
