LAOAG CITY – Natay ti 30 nga indibidual gapu iti panangatake dagiti armado a lallaki idiay Nigeria.
Basar kadagiti otoridad, dagiti rimmaut ket rimmuar manipud iti maysa a kabanbantayan nga asideg iti ili ti Kasuwan-Daji no sadinno nga inuramda ti tiendaan, tinakawanda dagiti pasdek negosio ken kinidnapda ti saan pay a masinunuo a bilang dagiti indibidual.
Simmangpet dagiti armado a lallaki a nakalugan kadagiti motorsiklo nga adda ti iggemda nga armas a pinagtitiponda dagiti tattao kagiddan ti panangpapatayda kadakuada.
Nagbalin a kangrunaan a problema iti uneg ti adu a tawen idiay Nigeria dagiti panangatake ken panang-kidnap dagiti armado a kriminal a gang nga ad-adda nga am-ammo iti awag a bandits ngem agtultuloy latta a ngumatngato dagiti report iti western ken central regions.
Mainaig iti daytoy, inpakaammo ni Abdullahi Rofia, maysa nga opisial ti Niger State Emergency Management Agency a naruay a tattao iti komunidad ti madandanagan, aglemlemmeng ken mabutbuteng a makisarita iti asinoman.
Kuna met ti pannakangiwat ti pulisia ti estado ti Niger a ni Wasiu Abiodun a nai-deploy ti emergency team tapno tulungan dagiti nasugatan ken naiget a maipatpatungpal ti seguridad tapno maisalakan dagiti na-kidnap.
Maipalagip nga idi Nobiembre ket na-kidnap ti sumurok 250 nga estudiante ken dagiti agpapaay manipud iti St. Mary’s Catholic school iti Papiri, Niger state.
