LAOAG CITY – Saan a bumaba iti 30 nga indibidual ti naipadamag a nakapasar ti red tide poisoning nga am-ammo kas paralytic shellfish poisoning kalpasan a nanganda ti kontaminado a tahong wenno green mussels iti Barangay Parasan, Daram, Samar.
Inbatad ti Regional Epidemiology and Surveillance Unit a dagiti naapektaran nga indibidual ket walo nga ubbing ken 22 a natataengan.
Kunana a 19 ditoy ket naipadalan iti medikal a konsultasion ken na-admit iti Samar Provincial Hospital idiay Catbalogan City, Samar idinto a 11 ti maag-agasan kas outpatient.
Inlawlawag ti Department of Health-8 a dagiti pasiente ket nakapasar dagiti sintomas kas ti panagsakit ti ulo, panagpipikel ti bagi, panagulaw, panag-vomit ken panagsakit ti buksit kalpasan a nanganda ti tahong nga aggapu iti baybay idiay Tinaogan, Zumarraga, Samar.
Inpetteng ti Bureau of Fisheries and Aquatic Resources (BFAR)-8 a ti baybay ti Daram ken Zumarraga ket karaman kadagiti pito a baybay iti pagilian a nagtalinaed a positibo iti red tide.
