LAOAG CITY – Nakipagpartisipar dagiti 300 a mannalon iti Rice Technology Forum a naangay iti ili ti San Nicolas kas paset ti Hybrid Rice Challenge.
Ti nasao nga aktibidad ket inorganisar ti Department of Agriculture Regional Field Office I, iti babaen ti pannakibinnulig da iti lokal a gobierno iti ili ti San Nicolas ken iti biang ti gobierno probinsyal.
Naammuan a saan laeng a dagiti mannalon iti nasao nga ili ti nakipagpartisipar no di ket manipud pay kadagiti nagduduma nga ili.
Kabayatan ti nasao nga aktibidad ket ditoy a naipakita dagiti resulta ti Hybrid Rice Challenge no sadinno a 30 a hybrid rice seeds manipud iti 13 a kompanya ti naimula partikular iti Barangay 22, San Guillermo iti nasao nga ili.
Daytoy ket tapno makita ken matingiting no ania a klase hybrid rice ti napintas tapno makatulong kadagiti mannalon.
Kinuna ni Mayor Mike Hernando, ti resulta ti Hybrid Rice Challenge ti agserbi a pagibasaran ti Department of Agriculture ken lokal a gobierno no ania a bin-i ti maidiaya kadagiti mannalon ditoy probinsya nangruna iti ili da.
Gapu iti daytoy, ket mangnamnama ti Mayor nga umdas ti suplay ti bagas ken mamentinar ti pammadayaw iti nasao nga ili a “highest rice yield” iti kada ektarya.
