LAOAG CITY – Inbatad ni Dr. Charito Malicad, ti City Information Officer ditoy ciudad ti Laoag a 200 a menor de edad nga agtawen ti 12 agingga iti 17 ti target a mabakunaan intono Lunes, Nobyembre 22.
Ti ciudad ti Laoag ti maysa kadagiti napili a lokal a gobierno a pakaiyuswatan ti pilot vaccaination kadagiti nasao nga ubbing.
Segun kenni Malicad, maiyuswat daytoy iti Laoag City General Hospital (LCGH) ken Pfizer ti mausar a bakuna mangrugi iti 8:00 ti bigat.
Kuna na a nakikoordinar ti Operation Center kadagiti kapitan ditoy ciudad ken adda ti master list dagiti mabakunaan ken dagiti opisyal ti mangvalidate ken mangitipon iti nagan dagiti saan pay a nailista a mabalin a mabakunaan.
Mainaig iti daytoy, kuna ni Dr. Joseph Adaya iti City Health Office (CHO) a 200 pay laeng ti target da gapo ta daytoy ti ummuna a gundaway nga agbakuna da kadagiti menor de edad.
Inlawlawag na nga awan met ti deperensya iti biang ti dosage ti maibakuna kadagiti ubbing a kas kadagiti natataengan.
Innayon na a nasanay dagiti kameng ti City Health Office a mangiyuswat ti panagbakuna iti nasao nga age group.
