LAOAG CITY – Manamnama a maileppas inton bulan ti Agosto ita a tawen ti 300 nga units ti housing project iti Brgy. Talingaan ditoy siudad ti Laoag.
Daytoy ket apaman a mangrugin ti pannakaipatakder dagiti units.
Segun iti kontraktor ti El Sands a ni Mr. Eliotte Louis McCollin a 24 nga oras ti maibusbos dagiti maseknan a construction workers tapno al-alisto a maileppas ti nasao a proyekto.
Inbatad a malaksid iti pannakaipasdek kadagiti building ket manarimaan payen ti pannakaipan ken pannakaiplastar ti linya para iti danum ken kuriente.
Kunana a ti nadakamat a proyekto ket maysa kadagiti programa ni Presidente Ferdinand Bongbong Marcos Jr. a Pambansang Pabahay para sa Pilipino Program babaen iti Department of Human Settlement and Urban Development.
Inlawlawagna a daytoy nga addang ti programa ket tapno masolbar ti parikot iti kinaawan ti bukud a pagtaengan dagiti naruay a Pilipino ngem masapol a PAGIBIG member ti mabalin nga agaplikar iti daytoy.
Kabayatanna, maragsakan ni Mayor Michael Marcos Keon a maysa ditoy siudad ti Laoag ti napili a pakaipatakderan ti housing program no sadino manipod iti 4,600 nga units ket addan ti 3 a ribu ti nanggundaway iti nasao a programa.
