LAOAG CITY – Nakairekord iti ciudad ti Laoag ti 3000 nga animal bite ita a tawen no ikumpara kadagiti napalabas a tawen.
Daytoy ti rason no apay a gutgutigoten ni Dr. Joseph Adaya iti Laoag City Health Office ti publiko a no makagat ket agpabakuna ti anti-rabies nangruna ket kaaduan kadagiti aso ditoy ciudad ket nagpositibo ti rabies.
Kunana a saan nga agtalek iti tandok wenno suma gapu ta saan a 100 a porsiento a maisalakan ti maysa nga idibidual no ti rabies ket nagwarasen iti bagi.
Nakairekord pay ti ciudad ti dua a pimmusay gapu iti rabies ken maysa ti agdama a banbantayan ti City Health Office gapu ti pannakagat iti warang nga aso.
Maipalagip a kinumpirmaran ni Dr. Samantha Josephine Cy Nicodini iti Veterinary Office nga adda 45 a nagpositibo ti rabies nga aso dituy ciudad, rason no apay a kalikagom da a makasarita dagiti opisyal ti barangay tapno katulongan da a mangmonitor iti daytoy.
