LAOAG CITY – Possible a maputol ti 30,000 a poon ti kayo iti ili ti Currimao partikular iti Brgy. Paguludan gapu ti manamnama a pannakaestablisar ti solar farm babaen ti ASTRA energy company.
Segun iti Community Environment and Natural Resources, 52 nga ektarya ti inaplikaran ti nasao a kompanya nga isu ti nakaimulaan ti rinibo a kayo a pakairamanan ti mahogany, niyog ken aro-o ngem ti laeng inrekomendarda ket ti 20 nga ektarya tapnu basbassit ti maputol a poon ti kayo.
Naamoan a dagitoy a kayo ket inmula dagiti miembro ti Batac Farmers Association.
Nupay kasta, kinuna ti nangibagi iti CENRO ket saan koma a maipalubos a madadael ti aglawlaw para kadagiti nasao a proyekto.
Kabayatanna, kwinestyunaran ni Mia Harumaya, director ti nasao a kompanya ti saan a pannakairenew ti lease contract ti asosasyon a nagmula ti cashew tree ken awan ti nagbalin iti daytoy.
Iti laksid dayta, ti takder ti CENRO ket uray saan a nai-renew ket saan nga isu ti problema gapu ta dagiti kayo a maputol.
Mainaig iti daytoy, ipaima ti gobierno probinsial iti ahensya a maseknan iti aglawlaw nu rumbeng a 52 nga ektarya ti mausar.
Immun-unan iti daytoy, inaprobaran ti Sang Panglalawigan ti resolusyon a mangsuporta ken mangiyendorsar ti pannakaestablisar ti nasao a proyekto.
