LAOAG CITY – Inpakammo ni Mrs. Janet Retamal, ti mangidadaulo iti Commission on Population ditoy ciudad ti Laoag nga adda iti 31 a babbai ditoy ciudad a nagpositobo ti breast cancer.
Daytoy ket kalpasan ti naiyuswat a libre a breast cancer screening babaen ti Laoag City General Hospital para kadagiti babbai nga agtawen ti 30 agingga iti 65 ditoy ciudad ti Laoag.
Inbatadna na a kadagupan kadagiti 166 a babbai a dimmalan iti breast cancer screening, 31 kadakuada ti positibo ti resultana.
Nupay kasta, kunana a dagiti nagpositibo ti breast cancer ket mairefer da iti Mariano Marcos Memorial Hospital and Medical Center iti ciudad ti Batac, pakairamanan iti Department of Health – Regional Office tapno agtultuloy a mamonitor ken matutukan dagitoy.
Inpasingked na a saanda a baybay-an dagiti babbai a nagpositibo ti breast cancer gapu ta suportaran da dagitoy ken ikkan iti naan-anay a tulong.
Ti naiyuswat a “Breast cancer screening” ket paset paylaeng ti selebrasyon ti Women’s month a tinawen maisaysayangkat para kadagiti babbai ditoy ciudad.
