LAOAG CITY – Agur-urayen ti agarup 33 a milyon a pisos a gunguna para kenni Hidilyn Diaz kalpasan a naiyalat na ti kaunaan a balitok a medlya ti Pilipinas iti pannakibalubal na iti 2020 Tokyo Olympics.
Basar iti Republic Act 10699, makaawat ti Olympic gold medalists iti 10 a milyon a pisos para kadagiti nakibalubal iti individual events.
Nagkari ti MVP Sports Foundation a mangipaay ti nayun a 10 a milyon a pisos iti gold medal winner.
Segun kenni MVP Sports Foundation chairman Manny V. Pangilinan, tarigagay na a maipakita ti abilidad dagiti Pilipino iti intero a lubong ken kabaelan da ti makibalubal.
Inpakaammo ti Philippine Olympic Committee ken Rep. Abraham Tolentino a mangipaay ti business tycoon Ramon S. Ang iti 10 a milyon a pisos iti kada balitok a medalya a maiyalat iti 2020 Tokyo Olympics.
Nagkari met ti Athlete, sports patron, ken Rep. Mikee Romero iti tallo a milyon a pisos para kadagiti gold medal winners idiay Tokyo.
Naiyalat ni Diaz ti kaunaan a balitok a medalya ti Pilipinas iti biang ti Olympics kalpasan a nangabak iti Women’s 55-kg weightlifting event.
Kabayatanna, naruay dagiti nangdayaw kenni Diaz kangrunaan kadagiti atleta ti Pilipinas ken dagiti kakadua na iti delegasyon iti 2020 Tokyo Olympics.
Babaen iti social media, inpadanun ni Pole vaulter EJ Obiena iti panangkablaaw na kenni Hidilyn, no sadinno a nakaaramid ti pakasaritaan ti Pilipinas.
Kuna ni Obiena nga iti daytoy a batch dagiti atleta ti Pilipino ti addaan potential a makaiyalat ti balitok a medalya, no sadinno a napasamaken.
Ni Obiena ti maysa pay a gold medal conterder iti Olympics
Kabayatanna, nagkablaaw pay ni Taekwondo jin Kurt Barbosa babaen iti twitter.
Umaboten ti 11 ti olympic medal ti Pilipinas, maysa a balitok a medalya, tallo a silver medal ken pito a bronze medal.
