LAOAG CITY – Inbatad ni Barangay Chairman Jessie Lagundino nga inpatungpal da ti preemptive evacuation kadagiti residente iti Barangay Pancian iti ili ti Pagudpud gapu iti napigsa a tudo a mapaspasaran da a gubuay ti bagyo Ofel.
Segun ken ni Lagundino, umabot iti 33 a pamilya wenno 83 nga indibidual ti naibakwit tapno masigurado ti kinatalged da kabayatan ti iduduprak ti bagyo.
Kuna na a dagiti evacuees ket agpapada a residente iti coastal areas a sakupen ti idaulwan na a barangay ken inkabil da dagitoy iti Pancian Elementary School.
Mainaig iti daytoy, inpakaammo ni Lagundino nga isudan a mismo ti agluto para iti kanen dagiti kabarangayan da a naibakwit ken ti magastos ket ibaklay da amin nga opisyal ti barangay.
