LAOAG CITY – Nakarekobre dagiti kameng ti Philippine National Police kadagiti naririt a kayo iti Sitio Bangwan, Barangay Quibel iti ili ti Dumalneg.
Daytoy ti inbatad ni Police Capt. Jackson Sugayen, ti chief of police iti nasao nga ili.
Inlawlawag na nga adda ti naawat da a report nga adda dagiti agpukpukan ti kayo iti kabanbantayan a paset ti nadakamat a barangay.
Gapu iti daytoy, kuna ni Sugayen a nagresponde da a dagus iti lugar ket ditoy a nakita da ti 33 a pedaso a naririt a kayo nga agbalor ti 11, 600 a pisos.
Inpakaammo ni Sugayen nga awan dagiti nadanun da nga agpukpukan ken nagririt kadagiti kayo.
Inpasingked na nga itultuloy da ti agimbestigar tapno maamoan no siasinno dagiti responsable kadagiti nakita da a naririt a kayo tapno mapagsungbat dagitoy.
Naiturnover a dagus dagiti narekobre a naririt a kayo ti City Environment and Natural Resources.
