LAOAG CITY – Saan nga inraman ti Trump administration iti $336 million assistance para iti modernisasyon ti Philippine security forces manipod iti ipatpatungpal a foreign aid freeze ti Amerika.
Daytoy ti inpakaammo ni Philippine Ambassador to the United States Jose Manuel Romualdez.
Segun ken ni Romualdez, paset ti nasao a kantidad iti $500 million foreign military financing wenno FMF nga inaprubaran ti US Congress iti napalabas a tawen iti babaen ti Biden administration.
Gagem ti $500-million a tulong ti napalabas a Biden administration a papigsaen ti defense capability ti Pilipinas, gapu iti panagbalin nga agresibo ti China iti South China Sea, karaman iti West Philippine Sea.
Immunan nga inpasardeng ti US State Department idi Enero ita a tawen ti amin a foreign assistance bayat iti panangrepaso iti sistema daytoy kas naiget a pammilin ni US President Donald Trump.
Kabayatanna, inbatad ni Romualdez a nakisarita pay ken ni US Secretary of State Marco Rubio maipanggep iti tulong ti Estados Unidos iti Pilipinas.
Kuna na a ditoy nga indeklarar manen ni Rubio ti “iron-clad” commitment ti Amerika iti Pilipinas a nabayagen a kaalyado na iti Asya.
