LAOAG CITY – Dumanon iti 34 a milyon a Pilipino wenno adda ti 6.9 a porsiento a pamilia ti mabenepisiaran iti ‘Bigas 29’ program ti National Food Authority a manamnama a mairubuat idiay Metro Manila ken napili a lugar iti pagilian.
Ti programa ket gagem a mailako kadagiti Kadiwa Centers ti bagas iti balor a P29 iti kada kilo.
Ti programa a “Bigas 29” ket limitado laeng iti vulnerable sector kas kadagiti benepisiario ti conditional cash transfer program ti gobierno, persons with disabilities, senior citizens ken solo parents.
Inpasigurado met ti National Food Authority a ti mailako a daan a bagas ket napintas ti kalidadna ken dimmalan iti naiget a pannakatingitingna.
Inbatad pay ni National Food Authority Administrator Larry Lacson nga adda ti sursurutenda nga standard a no naka-tallo a bulan ti bagas ket mabalin daytoy nga ikonsiderar nga aging stock ngem ti tallo a bulan a bagas ket saan nga old stock gapu ta iti laeng papel a maibagbaga nga aging stock ti bagas.
