LAOAG CITY – Umabot iti 34 a pagadalan ditoy probinsya ti nairekomendar a mangipatungpal ti limited face to face classes.
Daytoy ti inbaga ni Mrs. Cherry Joy Discaya-Garma, ti Information Officer iti Schools Division of Ilocos Norte.
Inbaga ni Garma nga agtultuloy ti panagsagan ti probinsya para iti daytoy nga addang babaen ti panangidaulo ni Dr. Joan Corpuz, ti Schools Division Supt. ditoy probinsya.
Maipalagip nga idi enero ita a tawen ket maysa laeng a pagadalan ti nairekomendar a mangipatungpal ti limited face to face classes.
Inpakaammo ni Garma a dagiti napili a pagadalan ket napili babaen ti konsultasyon nga insayangkat ti gobierno probinsyal no sadinno a maibilang dagitoy kas Low Risk Areas.
Karaman ditoy dagiti pagadalan manipod iti ili ti Dumalneg, Adams, Marcos, Carasi, Vintar ken Nueva Era.
Saan pay a masinunuo no kaanu a naan-anay a maaprubaran ken maipatungpal ti face to face classes kadagiti nasao a lugar.
