LAOAG CITY – Saan a bumaba iti 34 ti pimmusay ken 16 pay ti mapukpukaw kalpasan a dimmuprak ti flash floods ken cold lava flow manipod iti maysa a bulkan ti western Indonesia maibasar iti local disaster official.
Sumagmamano nga oras a napigsa a tudo ti nangitunda ti layus kadagiti dua a distrito iti probinsia ti West Sumatra idi Sabado ti rabii ken nangigubuay ti abo ken dadakkel a bato manipod iti Bundok Marapi nga isu ti kakaaktiboan a bulkan iti arkipelago ti Sumatra island.
Segun ken ni Ilham Wahab, pannakangiwat ti West Sumatra disaster agency, iti agdama, basar iti datosda, 34 nga indibidual ti natay: 16 iti Agam ken 18 iti Tanah Datar. Adda pay ti saan a bumaba iti 18 ti nasugatan ken agtultuloy pay laeng a mabirbiruk dagiti 16 a dadduma pay.
Tinamaan ti flash floods ken cold lava flow dagiti distrito nga Agam ken Tanah Datar agarup 10:30 ti rabii (1530 GMT) idi Sabado, basar iti Basarnas search and rescue agency.
Ti cold lava wenno lahar ket ti volcanic material kas ti abo, buhangin ken dagiti bato nga agpababa manipod iti tuktok ti bulkan gapu iti tudo.
Immunan nga inbatad ti Basarnas a 12 a tattao ti natay pakairamanan dagiti ubbing.
