LAOAG CITY – Balligi a naiwayat ti Search Operation iti Brgy. 4, San Guillermo ditoy siudad ti Laoag.
Nabigbig ti subject iti operasion a ni Irwin Corpuz Kuan wenno mas am-ammo iti naganna nga Irwin Corpuz, agtawen iti 39, awanan asawa, pintor ken residente iti nasao met a barangay.
Basar iti Philippine National Police ditoy siudad ti Laoag, kabayatan ti panagbiruk dagiti otoridad iti pagtaengan ti suspek kangrunaanna iti kuartona ket nabirukanda ti 36 a pedaso ti heat sealed transparent plastic sachet a naglaon ti maatap a shabu a naikabil dagitoy iti backpack nga agmaris ti nangisit a napandagan iti pungan ti suspek.
Malaksid iti daytoy, nabirukan pay dagiti otoridad ti maysa a calibre 22 a paltog nga addaan ti lima a bala iti uneg met laeng iti kuarto ti suspek pakairamanan dagiti drug paraphernalia.
Mainaig iti daytoy, sakbay a simrek dagiti maseknan a pulis a nangiwayat ti Search Operation iti pagtaengan ti suspek ket kinapkapan isuda dagiti barangay officials ken nagusarda ti body worn camera kas maiyataday iti linteg.
Naammoan a daytoy ti damo a naisayangkatan ti Search Operation ti nadakamat a suspek ken awan ti nakairamramananna nga aniaman a pakadaksanna iti barangayda.
Kabayatanna, inpetteng ni Corpuz nga adda ti simrek a tallo nga indibidual iti pagtaenganda sakbay pay a nangrugi ti pormal a Search Operation banag a naiget met a naglikudan dagiti otoridad.
Inadmitirna met nga agus-usar daytoy iti iligal a droga idi high school pay laeng isuna ngem nabayagen nga insardengna daytoy.
