LAOAG CITY – Inkali a dagus dagiti otoridad ti 340 a kilo a ti pork skin a nakumpiskar da iti maysa a terminal ti bus ditoy ciudad ti Laoag a maipagarop nga apektado ti African Swine Fever (ASF).
Iti eksklusibo nga interview ti Bombo Radyo Laoag ken ni Miss Shiela Rapatan de Leon, ti mangidadaulo iti Slaughter House ditoy ciudad, inbatad na nga adda ti naawat da a report nga adda dagiti karne ti baboy nga agkaiwarang iti saanen a nabigbig a bus terminal.
Gapu iti daytoy, dagus a nagturong iti lugar kadwa na dagiti dua a Meat inspectors ket ditoy a nakita da dagiti pork skin a mabalin a maaramid a barbecue ken chicharon kalpasan a nadadael ti karton a nakaikabilan da.
Naamoan a ti nangipatulod kadagiti pork skin ket agnagan ti Elizabeth Tamayo manipod Sampaloc,Manila ken ti Consignee na ket ni Alfred Rambaud, taga iti ili ti Paoay.
Inpetteng ni de Leon nga awan ti dokumento dagiti nasao a karne isut gapuna a kinumpiskar da dagitoy ken naki-koordinar da a dagus ken ni Provincial Veterinarian Doctor Loida Valenzuela.
Inpakaammo ni de Leon a nakasaritan ni Valenzuela ti consignee ken inikkan na ti 17 nga oras tapno ilawlawag da daytoy a pasamak.
Segun ken ni De Leon, kalpasan a naikali dagiti pork skin iti abot iti asideg ti slaughter house ket binukbukan da ti adu a disinfectant ken crude oil, kalpasan na ket ginaburan da manen ti darat ken binukbukan da manen ti disinfectant.
kuna ni del Leon a nangala ti sample ti pork skin ni Doctor Valenzuela tapno maeksamen.
Kabayatanna, naamoan nga iti agdama ket awan ditoy probinsya ti consignee isut gapuna a nangipatulod ti nangibagi kenkuana a nangimatang ti pannakaikali dagiti pork skin.
