LAOAG CITY – Inpakaammo ni Dr. Rodrigo Catcatan, mangidadaulo ti City Health Office ditoy ciudad ti Laoag a naawat dan dagiti anti-rabies vaccine ngem agarop 340 vials laeng ken dagitoy ket para iti 3rd quarter ita a tawen.
Inbatad ni Dr. Catcatan nga alisto laeng a maibus dagiti anti-rabies vaccine gapu ta ado latta dagiti agturturong iti opisina da tapno agpabakuna.
Inlawlawag na a dagitoy a bakuna ket libre amin a maipaay kadagiti umili nga agkasapolan ditoy ciudad ti Laoag.
Maipalagip nga immunan nga inpakaammo ti City Health Office nga awan pay iti kaso ti human rabies ita a tawen ken maymaysa pay laeng iti aso a nagpositibo iti rabies ditoy ciudad.
Innayon na a daytoy ti mangipakita nga agbalbalinen nga pet-friendly ken rabies free ditoy ciudad ti Laoag.
