LAOAG CITY – Umabot iti 35 nga indibidual ti nakagat ti aso ken dadduma pay a dingwen ditoy ciudad ti Laoag iti umuna a tallo nga aldaw ti tawen 2024.
Daytoy ti kinumpirmaran ni Doctor Joseph Adaya, City Health Officer ditoy ciudad.
Segun ken ni Adaya, dagiti napan nagpabakuna ti anti-rabies iti City Health Office ket agtawen ti 15-agpababa.
Inpakaammo na a ti kaubingan a tinudukan da ti anti-rabies ket ti dua a bolan na paylaeng a maladaga.
Gapu iti daytoy, inbalakad ni Adaya iti publiko nga agbalin a responsable iti panagtaraken ti aniaman a dingwen kangrunaan na dagiti aso tapno awan ti maapektaran ti rabies ditoy ciudad ti Laoag.
Inpasigurado ni Adaya nga adda ti umbas a bakuna kontra iti rabies ditoy ciudad ti Laoag isut gapuna a no adda dagiti makagat ti dingwen kangrunaan na ti aso a masapol a mapan agpabakuna a dagus imbes a mapan agpatandok.
Inpalagip na a dagiti nairekord a pimmusay gapu iti rabies ditoy ciudad ket ad-adda a pinili da ti napan nagpatandok imbes a napan da koma nagpabakuna kontra iti rabies.
