LAOAG CITY – Umabot iti 36 a tattao ti natay idinto a 27 a sabsabali dagiti nasugatan kalpasan a natnag iti derraas ti maysa a bus iti
Uttarakhand state idiay India.
Basar kadagiti otoridad, adda ti 44 nga indibidual a nakalugan iti bus idi napukawan ti control ti driver a nangitunda ti pannakatnag ti lugan iti derraas nga addaan ti kauneg a 50 a metro iti Marchula a masarakan iti Almora district.
Inbilin a dagus ti gobierno ti pannakaimbestigar a naimbag ti insidente.
Naamoan a dagiti bus ti kangrunaan a maus-usar a transportasyon iti Himalayan State ken naipagagangayen dagiti mapaspasamak nga insidente.
Mainaig iti daytoy, inpeksa ni Indian Prime Minister Narendra Modi ti pannakipagladingit na iti pamilya dagiti biktima.
Inwaragawag na ti pannakaipaay ti kompensasyon a 200,000 rupees wenno $2,378 para iti pamilya dagiti pimmusay idinto a 50,000 rupees kadagiti nasugatan iti insidente.
