LAOAG CITY – Umabot iti 36 a wanted persons dagiti natiliw kabayatan ti pannakaiyuswat ti Simultaneous Anti Criminality Law Enforcement Operation (SACLEO) wenno ti pannakatiliw dagiti wanted persons ditoy probinsya.
Daytoy ti kinumpirmaran ni Police Major Sheryl Guzman, pannakangiwat ti Ilocos Norte Police Provincial Office (INPPO).
Segun kenni Guzman, naiyuswat ti SACLEO idi Pebrero 6 agingga iti Pebrero 8 ita a tawen.
Inlawlawag na a pakadagupan iti nasao a bilang, siyam kadagitoy ket adda ti provincial level, lima iti municipal level ken 22 a sabsabali pay.
Mainaig iti daytoy, kuna ni Guzman nga uppat nga Municipal Police Station ti awan ti natiliw na a wanted person pakairamana ti Adams, Bangui, Dumalneg ken Pinili.
Nupay kasta, inbatad na a dagiti nadakamat nga uppat nga ili ket valid ti rason da nga awan ti natiliw dagitoy gapo ta awan met ti nailista a wanted persons iti ili da.
