LAOAG CITY – Natay dagiti 36 nga indibidual ken 140 dagiti nasugatan kalpasan a nadadael ti maysa nga ospital dagiti ubbing idiay Ukraine gapu ti panagpaputok manen ti Russia.
Kinuna ni Ukrainian President Volodymyr Zelensky, masapul a sanguen ti Russia dagiti posible a pagbanaganda gapu iti panangrautna kadagiti sibilian.
Naamuan a nasurok nga 40 a missile ti inusar ti Russia a nangdadael kadagiti pasdek, imprastruktura ken ospital iti nagduduma a ciudad ti Ukraine, pakairamanan ti Kyiv, Dnipro, Kryvyi Rih, Sloviansk, Kramatorsk.
Indiskribir ni Lesia Lysytsia, maysa a doktor iti ospital dagiti ubbing ti Okhmadyt, a panagpaputok ket nangdadael ti agaru 60-70% ti ospital.
Kabayatanna, inpasigurado ni Zelensky a maikkan ti hustisia ti napasamak iti nasao nga ospital.
