LAOAG CITY – Umabot iti 37 nga indibidual ti na-cite in contempt ti Kamara de Representantes ita a 19th Congress.
Kagiddan iti daytoy ket nalpasen ti 16-person detention facility ti Kamara de representantes iti babaen ti liderato ni Speaker Ferdinand Martin G. Romualdez no sadinno a maibalud dagiti indibidual a masa-cite in contempt ti nagduduma a komite iti panangannong iti mandato da.
Indaulwan da House Secretary-General Reginald “Reggie” S. Velasco ken Sergeant-at-Arms Napoleon “Nap” Taas ti inagurasyon ti uppat a kuwarto ti pasilidad a masarakan iti Legislative Security Bureau (LSB).
Naamoan nga umaboten iti pakabuklan a 37 ti contempt order nga inparuk-at ti Committees on Public Accounts; Public Order and Safety; Human Rights; Dangerous Drugs; Franchise; Agriculture, ken dadduma pay.
Iti agdama ket adda ti dua a nakabalud iti pasilidad, dagitoy ket da Daisy Quiros, maysa a real estate broker nga inpabalud ti Committee on Public Accounts, ken ni Ronilyn Baterna, ti Corporate Secretary ti Lucky South 99 nga inpabalud met ti Committee on Public Order and Safety.
