LAOAG CITY – Maaddaan ti nayon a 370 a personnel ti Police Regional Office (PRO) 1 iti Ilocos kalpasan a nakumpleto ti baro a bansada ti panagsanay.
Inbatad ni Maj. Divina Albino, mangidadaulo ti Police Regional Office-1 Information Office, nangrugi ti baro a bansada ti innem a bulan a Public Safety Basic Recruit Course-da iti Regional Training Center idiay Aringay, La Union kalpasan ti oathtaking idi Disiembre 17 ita a tawen.
Karaman iti panagsanay ti taktikal nga aktibidad ken dadduma pay a topiko mainaig iti pulisia pakairamanan ti husto a panagusar ti armas.
Kalpasan daytoy, sarunoen daytoy ti innem a bulan a Public Safety Field Training Program, maysa nga on-the-job training kadagiti nagduduma a police stations iti rehion.
Kuna ni Albino nga uray manarimaan ti panag-training dagitoy, makaawatdan ti PHP29,668 a base pay iti kada bulan.
Napili ti 370 recruits manipud iti 2,418 nga aplikante. Iti daytoy a bilang, 350 ti napili, 285 a lallaki, 65 a babbai manipud iti Attrition Recruitment Program idinto a 14 a lallaki ken 6 a babbai ti pimmasa manipud iti 108 nga aplikante ti Regular Recruitment Program.
