LAOAG CITY – Naragsak nga inpakaamo ni Atty. Donato Balderas Jr. ti Schools Division Superintendent ti Department of Education ti Ilocos Norte nga amin 372 a pagadalan a saklawen ti Dep-ed Ilocos Norte ket pormal a naglukat iti klasena idi kalman Hulio 29, para iti school year 2024-2025.
Kagiddan ti panaglukat ti klase ket binbalakadan na dagiti agad-adal nga igaed da iti panagbasa tapnon iti kasta ket magun-od dagiti arapa-apda iti panagbiag.
Mainaig iti daytoy, nagyaman met daytoy kadagiti amin nga timmulong bayat ti panagkaisayangkat iti Brigada Eskwela 2024-2025 nangruna kadagiti mangisursuro iti panangkita ken panangsigurado da iti kinatalged dagiti pagadalan para kadagiti ubbing.
Kabayatanna, mangnamnama ni Balderas a kadaytoy nga School year 2024-2025 ket agbalin a naanayas ti panagklase dagiti ubbing.
