LAOAG CITY – Nanayunan ti 39 a kaso ti covid-19 ditoy probinsya rason nga umaboten iti 2164 ti pakabuklan ti kaso ti nasao a virus.
Iti datus ti gobyerno probinsyal, 79 a pasyente dagiti nalaingan rason nga umaboten iti 1811 ti recoveries.
Manipud kadagiti 39 a baro a kaso, 15 ti kaso ditoy siudad ti Laoag, agpada a pito ti baro a kaso iti siudad ti Batac ken iti ili ti San Nicolas, agpada a tallo ti kaso iti ili ti Pinili, ken Currimao ken saggaysa iti ili ti Paoay, Marcos, Bacarra, ken Dingras.
Pimmusay ni IN-C2164, agtawen ti 34, babai, ken residente iti Brgy Mabaleng iti siudad ti Batac, nakapulapol ni IN-C2139 ken isuna ti kaudian a kaso a naimaldit idi kalman, Mayo 12, rason nga agdagupen iti 24 dagiti pimmusay.
Umaboten iti 329 ti aktibo a kaso ditoy probinsya, kaaduan ditoy siudad nga addaan iti 147 active cases, sumaruno iti ili ti San Nicolas nga addaan iti 40 nga aktibo a kaso, 33 iti siudad ti Batac ken 21 iti ili ti Bacarra.
