LAOAG CITY – Umabot iti 38 a tattao ti nakumpirmaran a natay kalpasan a nabirukan dagiti miyembro ti search team ti black box ti Azerbaijan Airlines flight J2-8243, ti passenger plane a nagsuek iti ciudad ti Aktau idiay Kazakhstan.
Ti black box ket maysa a plane device a naglaon kadagiti impormasyon seknan iti flight, airspeed, altitude, oras ti biyhae, ken dadduma pay nga impormasyon maipapan iti biyahe dagiti eroplano.
Segun ken ni Kazakhstan Deputy Prime Minister Kanat Bozumbayev, maysa a komisyon ti nabukel tapno idauluanda ti imbestigasyon iti plane crash tapno tulongan da dagiti pamilya dagiti pimmusay.
Kunana a nakasagana da ken ti gobierno ti Kazakhstan a makitinnulong kadagiti Azerbaijan authorities.
Iti agdama ket naala aminen a bangkay iti crash site, basar iti datus ti Kazakhstan, 29 ti nakalasat iti insidente.
