LAOAG CITY – Umaboten iti 39 nga indibidual ti natay kabayatan nga agtultuloy ti search and rescue operations iti sumagmamano a paset ti China kalpasan a nangitunda ti nalawa a panaglayos, panaglippias dagiti karayan ken pannakanarpuog dagiti dam ti napigsa a tudo ken bagyo.
Iti rehion ti Guangxi, adda ti sumurok 130,000 a residente ti naibakwit kalpasan ti nalawa a panaglayos gapu iti Bagyo Maysak.
Basar kadagiti otoridad, sumurok 40 a karayan ken pagnaan ti danum ti naglippias ken rinibribu nga ektaria ti pagtatalonan ti nadadael.
Kabayatanna, 11 ti natay idinto a 331 ti nasugatan iti Hubei province gapu iti napigsa nga angin, kimat ken ipo-ipo no sadinno a maysa ti mapukpukaw ken rinibribu a pagtaengan ti nadadael.
Nangipatuloden ti gobierno ti nayon a relief supplies ken rescue equipment kadagiti naapektaran a lugar idinto a nagballaag dagiti opisial nga agtultuloy pay ti napipigsa a tudo kadagiti sumarsaruno nga aldaw.
Inbilin ni Presidente Xi Jinping dagiti rescuer a paigetan dagiti emergency operation tapno maliklikan ti ad-adu a pannakadadael ken pannakatay.
