LAOAG CITY – Nagpila ti reklamo dagiti uppat a barangay tanud iti Barangay Raraburan ditoy ciudad ti Laoag kontra iti maysa nga empleado ti gobierno lokal ditoy ciudad kalpasan a maipagarop a pinaturungan na dagitoy ti paltog.
Basar ken ni Barangay Chief Tanud Analiza Perez Balino, kabayatan a nakaduty da iti barangay hall ken iyur-uray da dagiti kameng ti Philippine National Police tapno mapan da respondean ti maysa a balasang iti metlaeng barangay da ket adda ti limmabas a nakamotorsiklo a nakaringringgor ti tambutso na.
Iti saan a nagbayag ket simmaruno met ti maysa nga Sport Utility Vehicle (SUV) nga inturong ni Mr. Clinthon Ulep iti General Services Office iti gobierno lokal ditoy ciudad.
Kuna ni Balino a sinaludsud ni Ulep iti namin-tallo a daras no am-ammo da ti nakamotorsiklo ngem insungbat da nga awan ti makaam-ammo kadakuada.
Gapu iti daytoy, pimmanaw ni Ulep ngem kalpasan laeng ti tallo agingga iti lima a minutos ket nagsubli manen ni Ulep ken inulit na a sinaludsud no am-ammo da ti nakamotorsiklo, a sinungbatan da manen daytoy nga awan ti makaam-ammo kadakuada.
Iti dayta a gundaway ket isu metten ti maipagarop a panangikasa ni Ulep ti paltog na ken inpaturong na kadakuada.
Inpakaammo ni Balino a kalpasan ti inaramid ni Ulep ket inpaigid na ti lugan na iti sirok ti poon ti mangga, no sadinno a ditoy metten a ginundawayan da ti nagtataray nga immadayo iti lugar.
Mainaig iti daytoy, iti panagturong ti news team ti Bombo Radyo Laoag ken ni Ulep ket nagkedked daytoy a nangipaay ti komento gapu ta iyur-uray na paylaeng ti subpoena nga aggapo iti piskalya sakbay a mangiparuk-at ti statement na mainaig iti nasao a pasamak.
